Nemendur Tálknafjarðarskóla í starfskynningu

Ólöf, Berglind og Ola í starfskynningu hjá Sjótækni
Ólöf, Berglind og Ola í starfskynningu hjá Sjótækni
1 af 2

Tálknafjarðarskóli tók upp samstarf við fyrirtæki á Tálknafirði síðastliðinn vetur um að taka á móti skólabörnum í starfskynningar þar sem þau kynntust starfsemi fyrirtækjanna og þeim verkefnum sem unnið er að í hverju fyrirtæki fyrir sig. Vegna Covid-19 féllu þessar heimsóknir niður seinnipart vetrar en hófust að nýju með haustinu.

Við hér hjá Sjótækni tókum á móti fyrsta hópnum í byrjun september þegar þær Berglind, Ola og Ólöf komu til okkar. Þeim var kynnt starfsemi fyrirtækisins í máli og myndum og sýnd tól og tæki til ýmissa nota. Meðal annars var þeim sýndur búnaður kafaranna og afþrýstiklefinn sem Sjótækni á og þær fengu að fara inn í hann til að skoða hann betur. Í seinni heimsókninni var þeim svo boðið um borð í Össu BA, eitt af skipum Sjótækni sem lá við bryggju á Tálknafirði. Þar tók Kjartan J. Hauksson framkvæmdastjóri á móti þeim og sýndi þeim skipið og kynnti fyrir stelpunum verkefnin sem nota á skipið í og sýndi þeim meðal annars ljósleiðara sem á að leggja austur á fjörðum á næstunni. Við hjá Sjótækni þökkum þeim Berglindi, Olu og Ólöfu  fyrir komuna og vonum að þær hafi haft gagn og gaman af heimsókninni.

Nýtt skip Sjótækni kemur í heimahöfn á Tálknafirði

Assa á siglingu á Hópinu á Tálknafirði
Assa á siglingu á Hópinu á Tálknafirði
1 af 5

Á undanförnum mánuðum hefur verið unnið að því að standsetja skip í eigu Sjótækni ehf á Tálknafirði sem alhliða vinnu- og dýpkunarskip. Skipið ber nafnið Assa BA og var áður í eigu Olíudreifingar hf og bar þá nafnið Laugarnes.

Assa kom í heimahöfn á Tálknafirði laugardaginn 05.09.2020 eftir viðkomu í Reykjavíkurhöfn til að sækja ljósleiðara sem á að fara að leggja í Berufirði á Austfjörðum. Assa er 41,28 m langt og 371 brúttótonn að stærð. Það er smíðað 1978 og var notað í olíuflutninga við Grænland áður en það var keypt hingað til lands í olíuflutninga hér.

Assa er stærsta skip sem skráð er á Tálknafirði. Ásamt Össu rekur Sjótækni ehf fjóra aðra báta sem notaðir eru í þjónustu við fiskeldisfyrirtæki og við lagnir sæstrengja auk annarra verkefna sem Sjótækni tekur að sér. Kjartan J. Hauksson framkvæmdastjóri og annar eigenda Sjótækni var að vonum ánægður með að vera kominn með skipið í heimahöfn tilbúið til verkefna.

Ætlunin er að nota Össu í ýmis verkefni fyrir Sjótækni svo sem við lagningu sæstrengja, dýpkunarframkvæmdir og önnur verkefni sem til falla.

Skýrsla Sjótækni um notkun Humidur

Á síðasta ári fékk Sjótækni rannsóknarstyrk frá Vegagerðinni til að fá reynslu af notkun efnisins Humidur við íslenskar aðstæður. Efnið Humidur er framleitt af fyrirtækinu Acotec í Belgíu og hefur verið notað um allan heim við viðgerðir á höfnum, brúm, vindmyllum og öðrum mannvirkjum auk notkunar þess í olíu- og gasiðnaði. Efnið Humidur var þróað af Acotec með lágmarks umhverfisáhrif og góða endingu að markmiði í hvers konar vatnsumhverfi. Það þolir saltvatn og seyru auk þess sem það er notað í tönkum fyrir drykkjarvatn, olíu og ýmis konar efnavörur. Humidur er laust við leysiefni, þungmálma, tjöru og rokgjörn lífræn efni og hefur sýnt sig að vera mjög umhverfisvænt og sterkt efni sem þarf lítið sem ekkert viðhald eftir að búið er að þekja með því. Það stöðvar eyðingu af völdum lífrænna eyðingarvalda án þess að drepa þær lífverur sem valda eyðingunni og lengir þannig líftíma mannvirkisins umtalsvert. Á notkun Humidur er 10 ára ábyrgð en þar sem það hefur verið notað á undanförnum 30 árum hefur ekki þurft að endurnýja efnið og því óhætt að fullyrða að ending þess er mikil.

Sjótækni notaði efnið Humidur við málun stálbita í brúnni yfir eystri ós Héraðsvatna í Skagafirði á síðasta ári. Allir verkferlar voru skráðir og ýmis konar mælingar á efninu voru framkvæmdar við húðun stálbitanna til að fá betri sýn á notkun efnisins. Ætlunin er að fylgjast með því hvernig efnið reynist við íslenskar aðstæður næstu þrjú árin með mælingum og myndatökum. Í meðfylgjandi skýrslu má sjá hvernig unnið var með efnið Humidur við húðun stálbitanna í brúnni og þær mælingar sem voru gerðar meðan á framkvæmdinni stóð.

Áhugasamir eru hvattir til að hafa samband við Sjótækni til að kynna sér efnið Humidur og notkun þess. Einnig má sjá upplýsingar um efnið og notkun þess hér á heimasíðu Sjótækni undir flipanum Mannvirki.

 

Skýrsluna má finna á þessari slóð:

https://sjotaekni.is/skrar/skra/18/