Sjótækni ehf. - Fréttir

Sjótækni tekur þátt í prófun á umhverfisvænni ásætuvörn

Tue, 11 May 2021 08:42:00 +0000

Sjótækni og sprotafyrirtækið Hripa ehf eru nú í samstarfi um að prófa nýja gerð af umhverfisvænni ásætuvörn til notkunar í sjó. Sprotafyrirtækið Hripa ehf hefur með styrk frá Tækniþróunarsjóði þróað ásætuvörn án allra eiturefna, sem geta skaðað umhverfi og lífverur í sjó. Í samstarfi við Náttúrustofu Vestfjarða og með aðstoð frá fyrirtækjunum Arctic Fish og Egersund Ísland hefur Hripa gert prófanir með ásætuvörnina fyrir fiskeldisnet undanfarin tvö ár og eru niðurstöðurnar mjög jákvæðar.

Þegar rannsóknarskipið Kafari BA var í slipp í Njarðvík í mars s.l. var ásætuvörnin frá Hripu borin á ákveðin svæði neðan sjólínu á báðar hliðar bátsins og verður spennandi að fylgjast með hvernig hún virkar þar í samanburði við venjulega botnmálningu.

Hripa hefur sótt um alþjóðlegt einkaleyfi fyrir ásætuvörninni og eru nú margvíslegar frekari rannsóknir í gangi á virkni ásætuvarnarinnar, sem og skaðleysi gagnvart fiski og öðru sjávarlífi í samstarfi við fleiri aðila á Íslandi, í Noregi og í Svíþjóð.

Sjótækni leggur mikla áherslu á að lágmarka umhverfisáhrif starfsemi sinnar og að efni og vörur sem fyrirtækið notar hafi sem minnst umhverfisáhrif. Það er því afar jákvætt og í samræmi við umhverfisstefnu Sjótækni að aðstoða við þróun á umhverfisvænni ásætuvörn, sem mikil þörf er fyrir.

Mælingar í Djúpinu

Tue, 04 May 2021 08:37:00 +0000

Mælingabátur Sjótækni hefur verið á ferðinni í Ísafjarðardjúpi við mælingar á mögulegum kvíastæðum fyrir fiskeldi í vetur. Þegar kanna þarf botn og aðstæður fyrir kvíar kemur mælingabátur Sjótækni að góðum notum og sannar hann svo sannarlega máltækið „margur er knár þótt hann sé smár“. Það hjálpaði að sjálfsögðu til við verkið að veðrið var eins og best er á kosið og fjöllin við Ísafjarðardjúp settu upp sólarhattinn í tilefni dagsins.

Valur kominn til hafnar á Tálknafirði

Tue, 23 Mar 2021 09:59:00 +0000

Á föstudaginn 19.03.2021 kom nýr vinnubátur Sjótækni ehf, Valur, til hafnar á Tálknafirði í fyrsta sinn og var af því tilefni boðið til móttöku um borð í bátnum í Tálknafjarðarhöfn. Íbúum á Tálknafirði, Patreksfirði og Bíldudal ásamt nágrönnum var boðið að koma og skoða nýja skipið og þiggja veitingar. Áður hafði verið boðið til móttöku í Reykjavíkurhöfn og á Akranesi þar sem viðskiptamönnum Sjótækni og velunnurum var boðið að koma og skoða skipið og þiggja veitingar. Fjöldi fólks kom um borð í bæði skiptin og leist vel á nýja bátinn. Kjartan J. Hauksson framkvæmdastjóri Sjótækni þakkar öllum kærlega fyrir að koma og gleðjast með okkur hjá Sjótækni í tilefni af komu nýja skipsins og fyrir góðar óskir okkur til handa. Fleiri myndir úr móttökunni í Reykjavík og Tálknafirði má finna hér á heimasíðunni undir Myndir og Vinnubáturinn Valur.

Vinnubáturinn Valur í Reykjavíkurhöfn

Thu, 18 Mar 2021 15:12:00 +0000

Nýr vinnubátur Sjótækni, Valur, kom til hafnar í Reykjavíkurhöfn í gær og var gestum boðið að koma og skoða bátinn af því tilefni. Margir lögðu leið sína um borð um í bátinn og óskuðu Kjartani J. Haukssyni, framkvæmdastjóra Sjótækni og áhöfn hans til hamingju með nýja bátinn. Framundan er síðan sigling til Tálknafjarðar í dag og vonast er til að hægt verði að bjóða Tálknfirðingum og nærsveitungum að koma og skoða bátinn á morgun, föstudag. Meðfylgjandi myndir voru teknar í móttökunni um borð í Val í gær.

Nýr vinnubátur Sjótækni kominn til landsins

Tue, 16 Mar 2021 11:25:00 +0000

Nýr vinnubátur Sjótækni, Valur, kom til landsins um helgina og var hífður frá borði flutningaskips í Berufirði á sunnudaginn. Framkvæmdastjóri Sjótækni, Kjartan J. Hauksson tók á móti bátnum ásamt starfsmönnum Sjótækni, þeim Guðbjarti Ásgeirssyni, þjónustustjóra og Marteini Þór Ásgeirssyni, útgerðarstjóra. Þeir sigldu síðan bátnum til hafnar á Djúpavogi þar sem var tekinn kostur og olía og síðan héldu þeir af stað til Vestmannaeyja sem var fyrsti áfangi á leið vestur til Tálknafjarðar. Kjartan er skipstjóri í ferðinni, Marteinn yfirstýrimaður og Guðbjartur yfirvélstjóri og þeir sögðu bátinn hafa reynst vel í þessari fyrstu siglingu við Íslandsstrendur og ferðin til Eyja gekk vel þrátt fyrir leiðinda veður á leiðinni.

Valur er öflugur vinnubátur sem sinnt getur þjónustu við fiskeldismannvirkin og unnið við uppsetningu nýrra kvía og festinga þeirra ásamt margskonar öðrum verkefnum sem Sjótækni fæst við. Vinnubáturinn er af gerðinni Catamaran NABCAT 1510 DD frá Moen Marin í Noregi og er 15 m langur og 10 m breiður. Vinnubáturinn er tvíbytna og búinn öflugum vélum ásamt krönum og búnaði til að setja út og strekkja kerfisfestingar fyrir kvíar. Góð aðstaða er fyrir áhöfnina um borð og fór vel um áhöfnina í þessari fyrstu siglingu bátsins frá Djúpavogi til Vestmannaeyja. Stefnt er á að sigla bátnum til Reykjavíkur og þaðan vestur á Tálknafjörð um leið og veður leyfir. Um leið og Valur kemur vestur fer hann í verkefni í Dýrafirði á vegum Arctic fish.

Kafari BA í slipp í Njarðvík

Thu, 04 Mar 2021 15:25:00 +0000

Undanfarnar vikur hefur báturinn Kafari BA verið í slipp í Njarðvík í viðgerðum og endurbótum. Gert var við skrúfuna sem hafði látið á sjá, spilið yfirfarið og lagfært og vatnstankur hreinsaður. Einnig voru endurbætur á rekkverki og síðustykki bátsins sem var fært lítillega út ásamt endurbótum á stýrishúsi og gluggum á stýrishúsinu. Að síðustu var Kafari BA málaður hátt og lágt.

Kafari BA var smíðaður á Seyðisfirði 1979 og þjónaði sem ferja milli Árskógsstrandar og Hríseyjar í upphafi en frá 2008 hefur hann verið skráður sem rannsóknarskip og hefur verið notaður í margvíslegum verkefnum hjá Sjótækni svo sem við köfun, lagningu sæstrengja og eftirlit með lögnum í sjó fyrir ýmsa aðila um allt land.

Kafari BA var sjósettur í Njarðvík í morgun, 04. mars eftir viðgerðirnar og fer beint í verkefni sem bíða hans. Svo skemmtilega vill til að nýr bátur Sjótækni, Valur, sem smíðaður er í Noregi var einnig að koma úr slipp úti í Noregi og var settur um borð í flutningaskip í morgun sem mun flytja hann til Íslands.

Það styttist í nýja bátinn

Thu, 21 Jan 2021 14:10:00 +0000

Kjartan J. Hauksson framkvæmdastjóri Sjótækni ehf skrifaði á dögunum undir kaupsamning um nýja vinnubátinn sem Sjótækni kaupir af Moen Marin AS í Noregi. Í ljósi sóttvarna er notast við rafrænar undirskriftir þar sem ekki var hægt að fara milli landa og skrifa undir á hefðbundinn hátt. Í samningnum er gert ráð fyrir að báturinn verði tilbúinn til afhendingar í Kolvereid í Noregi þann 01. mars. Það styttist því í að Sjótækni fái nýja vinnubátinn afhentan og tilhlökkunin er mikil.

Sjótækni festir kaup á vinnubát

Thu, 17 Dec 2020 09:38:00 +0000

Ánægjulegur áfangi náðist í samstarfi Sjótækni á Tálknafirði og fiskeldisfyrirtækjanna Arnarlax og Arctic fish þegar fulltrúar fyrirtækjanna undirrituðu þjónustusamninga á dögunum á Ísafirði. Sjótækni hefur annast ýmsa þjónustu fyrir fiskeldisfyrirtækin á Vestfjörðum á undanförnum árum og ná þessir samningar yfir þau verkefni sem sinna þarf. Samningarnir eru í gildi til fjögurra ára og fela í sér aukin tækifæri til uppbyggingar í þjónustu og búnaði Sjótækni.

Sjótækni er hafsækinn verktaki sem sinnir uppsetningu, eftirliti, viðhaldi og þjónustu við ýmiskonar mannvirki í sjó og vatni fyrir fyrirtæki, stofnanir og sveitarfélög ásamt því að reka öfluga köfunarþjónustu. Fyrirtækið þjónustar bæði stóra og litla verkkaupa við fjölbreytt verkefni um allt land og erlendis eftir því sem verkkaupum hentar. Framkvæmdir tengjast meðal annars fiskeldi, neðansjávarlögnum, mannvirkjum í sjó og vatni, skipaþjónustu, virkjunum og stóriðju. Fyrirtækið gerir út báta, vinnuskip, pramma, þjónustubíla og mikið af sérhæfðum tækjum og búnaði svo sem sjó- og vatnamælingatæki af fullkomnustu gerð. Sjótækni ehf er með höfuðstöðvar á Tálknafirði.

Sjótækni er staðsett í Hafnarhúsinu á Tálknafirði og unnið hefur verið að endurbótum á því svo húsið rúmi betur starfsemi og búnað félagsins. Framundan er mikilvæg fjárfesting hjá Sjótækni þar sem gengið hefur verið frá samningum um smíði á nýjum vinnubát fyrirtækisins í Noregi. Um er að ræða öflugan vinnubát sem sinnt getur þjónustu við fiskeldismannvirkin og unnið við uppsetningu nýrra kvía og festinga þeirra ásamt margskonar öðrum verkefnum sem Sjótækni fæst við. Vinnubáturinn er af gerðinni Catamaran NABCAT 1510 DD frá Moen Marin í Noregi og er 15 m langur og 10 m breiður. Vinnubáturinn er tvíbytna og búinn öflugum vélum ásamt krönum og búnaði til að setja út og strekkja kerfisfestingar fyrir kvíar. Góð aðstaða verður fyrir áhöfnina um borð og mun báturinn auðvelda alla vinnu hjá Sjótækni við fiskeldið. Von er á bátnum til Íslands í mars og beðið er með eftirvæntingu og tilhlökkun að takast á við framtíðar verkefni.

Með þessum samningum Sjótækni við fiskeldisfyrirtækin Arnarlax og Arctic fish heldur áfram hið góða samstarf sem fyrirtækin hafa átt um árabil.

Samningar Sjótækni við fiskeldisfyrirtækin undirritaðir

Fri, 11 Dec 2020 14:05:00 +0000

Ánægjulegur áfangi í starfsemi Sjótækni náðist í gær þegar undirritaðir voru þjónustusamningar við fiskeldisfyrirtækin Arnarlax og Arctic fish um þjónustu við fiskeldiskvíar þeirra á Vestfjörðum. Sjótækni hefur þjónustað fiskeldisstarfsemi á Vestfjörðum á undanförnum árum og með þessum samningum er áframhaldandi samstarf fyrirtækjanna staðfest.

Nánar má lesa um undirritunina í frétt á heimasíðu BB

http://www.bb.is/2020/12/arctic-fish-og-arnarlax-gera-thjonustusamning-vid-sjotaekni/

Kafbátur hjá Sjótækni

Fri, 04 Dec 2020 09:09:00 +0000

Eitt af þeim tækjum sem Sjótækni á og rekur er kafbáturinn okkar sem er notaður til að taka myndir af sæstrengjum, kvíum og öðrum mannvirkjum sem eru neðansjávar. Oft er fljótlegra að nota kafbátinn til að mynda slík mannvirki en að senda kafara niður til þess og oft eru þessi mannvirki á meira dýpi en kafarar ráða við með góðu móti.

Á dögunum voru starfsmenn Sjótækni úti í Vestmannaeyjum þar sem myndaðar voru lagnir fyrir HS Veitur og þá kom kafbáturinn okkar að góðum notum við að skoða legu lagnanna og ástand þeirra á sjávarbotninum. Meðfylgjandi myndir eru teknar við ýmis tækifæri við notkun kafbátsins í sumar auk Vestmannaeyja.